Un dos principais retos asumidos pola conselleira de Pesca dende a súa chegada ó goberno autonómico foi a mellora das condicións sociais e de vida dos traballadores do mar. Para conseguilo, unha das ferramentas básica han de ser os Grupos de Acción Costeira, nos que están integrados e representados o sector pesqueiro, o económico, social e público. Desde a Consellería impulsouse a creación de sete Grupos, que cubren todo o litoral galego, e que teñen entre os seus obxectivos a dinamización das zonas pesqueira e a mellora da situación dos traballadores do mar, un reto para o que a Consellería dispón dun orzamento de 40 millóns de euros.
Neste segundo semestre de 2008 a Consellería de Pesca centrou boa parte dos seus esforzos na constitución dos Grupos de Acción Costeira, unha iniciativa enmarcada no Eixo Prioritario número 4 do Fondo Europeo de Pesca e que ten como obxectivo primordial acadar o desenvolvemento sustentable das zonas do litoral. A Consellería dispón de un orzamento de 40 millóns de euros para botar a andar esta iniciativa.
O obxectivo principal desta actuación é estimular a creación de novas fontes de ingresos sostibles para incrementar de xeito apreciable a calidade de vida nas comunidades e zonas pesqueiras. Para este fin, é indispensable proporcionar as ferramentas necesarias a aqueles axentes económicos e sociais que mellor comprenden os problemas e retos das comunidades pesqueiras co fin de adoptar as solucións ás súas demandas reais.
O traballo iniciado pola Consellería de Pesca permitirá que Galicia conte con sete Grupos de Acción Costeira, atendendo á distribución do litoral galego. Así, a Mariña lucense e Ortegal, o Golfo Ártabro, a Costa da Morte, o Seo de Fisterra-Muros e Noia, a Ría de Arousa, a Ría de Pontevedra e a Ría de Vigo-A Guarda, botaron xa a andar os GAC, nos que están representados os sectores pesqueiro, o social, o económico e o sector público, contando cunha mostra representativa de todos estes sectores, correspondendo o 50 por cento do peso nos órganos de Goberno ao sector pesqueiro.
Entre os requisitos que tiveron que cumprir os Grupos de Acción Costeira, cuia constitución rematou o pasado mes de outubro, está o Plan Estratéxico Zonal, que ofrece unha diagnose do sector, propostas de actuación e de execución.
Para poder levar adiante estes proxectos, deberá terse en conta a súa viabilidade técnica, o impacto económico, social e medioambiental sobre o territorio, o aproveitamento de recursos endóxenos, o carácter innovador e dinamizador das iniciativas, así como a capacidade de transferencia a outros territorios, a igualdade de oportunidades e a adecuación coa estratexia establecida polo grupo no Plan Estratéxico Zonal. En relación á proposta de execución do PEZ, deberá establecerse un plan financeiro, un cronograma de execución, os gastos de xestión necesarios e os sistemas de control e seguimento do Plan.
Finalmente, entre os elementos transversais do Plan Estratéxico Zonal, deberán establecerse os mecanismos para garantir a aplicación dos principio de igualdade de oportunidades; o enfoque innovador da estratexia e as actuacións previstas; un plan de información, publicidade e transferencia; e fixar o grao de sustentabilidade do proxecto e do GAC máis alá da xestión do programa.
As actuacións que se establezan dentro de cada Plan deberán buscar o fortalecemento da competitividade do sector pesqueiro, en especial a mellora da comercialización; a promoción económica coa creación de emprego e oportunidades económicas; a mellora do contorno natural e a calidade ambiental; e a promoción da cohesión social. Ademais de todo, deberá fomentarse a sociedade da información e as novas tecnoloxías, a igualdade de oportunidades, a cooperación e a participación.
