Santiago de Compostela, 7 de marzo de 2008.- A partires de hoxe mesmo os consumidores poderán atopar os primeiros produtos da baixura e o marisqueo etiquetados coa marca de calidade “PescadeRías, de onde se non” que puxo en marcha a Consellería de Pesca e Asuntos Marítimos. Así o tiñan anunciado o Presidente da Xunta de Galicia, Emilio Pérez Touriño, e a titular de Pesca, Carmen Gallego Calvar, durante a presentación oficial ao público deste distintivo, que tivo lugar na Praza de Abastos de Compostela o pasado día 12 de febreiro, e no que estiveron arroupados polo propio sector pesqueiro, así como o hostaleiro e comercializador.

Deste xeito, as primeiras lonxas auditadas e autorizadas para dar comezo á certificación dos seus produtos con “PescadeRías” son as de Baiona, Vilaboa, Portonovo e Campelo. A primeira delas etiquetará ourizo, robaliza, ameixa fina e percebe; e a segunda, ameixa fina, babosa, xaponesa e rubia, así como berberecho e carneiro. Portonovo certificará pescada, pescadilla, raia e abadexo; e a lonxa de Campelo, ameixa fina, babosa, bicuda e berberecho.

Así mesmo, tamén inician a súa andaina como usuarios da marca a empresa de distribución de peixes e mariscos Mariscos Comesaña de Nigrán, e as depuradoras Mariscos Campelo de Poio e José María Daporta e Hijos de Tragove (Cambados). As especies que poderán etiquetar son robaliza, percebe e ourizo; ameixa fina, babosa, xaponesa, rubia, berberecho e carneiro; así como ameixa fina, babosa, xaponesa, rubia, berberecho, carneiro, cornicha e zamburiña, respectivamente.

A curto prazo, e despois de acadar o visto bo dos auditores independentes que se encargan de observar e certificar que os posibles usuarios cumpren con todas as condicións que establece o regulamento da marca, iranse sumando máis entidades á listaxe de certificadores autorizados de “PescadeRías”.

Valor engadido para os produtos da baixura galega

A posta en marcha deste selo por parte do departamento que dirixe Carmen Gallego, que conta co respaldo do conxunto do sector pesqueiro e marisqueiro galego, comezou en maio do ano 2006. Un dos obxectivos desta iniciativa é darlle valor engadido aos produtos da baixura de Galicia, o que   axudará   á xente do mar a mellorar as súas rendas. Así mesmo, esta marca de calidade permitirá aos consumidores estar ben informados sobre o que levan á casa, axudando a evitar o fraude aos compradores.

Neste sentido, cabe sinalar que só poden ampararse baixo “PescadeRías, de onde se non?” aqueles recursos procedentes da pesca e o marisqueo frescos ou preparados, extraídos en augas da plataforma continental situada entre as liñas que marcan a desembocadura do río Miño e do Eo pola frota que sae e entra diariamente de porto, e que son capturados con artes selectivas. Os criterios que caracterizan a estes produtos son a orixe galega da pesca artesanal, un tempo de desembarco dende a súa captura non superior ás 24 horas e uns estándares de calidade.

Desta forma, un total de noventa e nove recursos procedentes da baixura galega teñen a posibilidade de acollerse á certificación “PescadeRías, de onde se non?”. Os grupos de especies amparados pola marca son: algas, moluscos, crustáceos, equinodermos e peixes, mentres que os usuarios dos recursos certificados polo distintivo son: lonxas, centros de depuración/expedición; cetarias e distribuidores de peixes e mariscos que teñan as súas instalacións ubicadas en territorio galego. Así mesmo, o regulamento contempla a posibilidade de certificación daquelas empresas que realicen en Galicia procesos de transformación de produto amparado por esta marca, aínda que neste suposto certificarase a cadea de custodia do produto que leva o selo.

Estas instalacións deben cumprir coas concesións, autorizacións, licenzas ou permisos que lles sexan de aplicación segundo as disposicións legais vixentes que regulan e afectan á súa actividade. Para isto, cada empresa debe ter identificados todos os requisitos legais aplicables ás súas instalacións e á súa actividade; dispor dos permisos e licenzas establecidos pola lexislación; e atender ás inspeccións e rexistros necesarios que aseguren o cumprimento dos requisitos legais e das normas específicas do regulamento da marca “PescadeRías, de onde se non?”.

Ademais, os usuarios do distintivo deben garantir o cumprimento da normativa hixiénico-sanitaria que se lles aplique, en especial aquela referida á adecuación das prácticas e comportamentos do persoal na manipulación dos produtos, das condicións ambientais de manipulación (temperatura, limpeza ou desinfección) e das instalacións e equipos empregados.

É de destacar que a posta en marcha de “PescadeRías” contou, en todo momento, coa colaboración do propio sector, que manifestou amplamente a súa aposta decidida por esta iniciativa. Nesta cooperación destacan as accións formativas realizadas nas propias confrarías de pescadores a cargo dos técnicos da Consellería de Pesca. A esta tarefa seguiu un proceso de formación nas lonxas que se ve agora complementada polas auditorías naqueles establecementos que, despois dos cursos de formación, están en disposición de certificar o produto.