Xuntanza do Órgano de Xestión, Seguimento e Control da Reserva Mariña de Lira que tivo lugar na Sala de Xuntas da Consellería de Pesca e Asuntos Marítimos

Santiago de Compostela, 11 de xaneiro de 2008.- O Diario Oficial de Galicia (DOG) publica hoxe a Resolución do 18 de decembro de 2007, da Dirección Xeral de Recursos Mariños, pola que se abre o prazo de presentación de solicitudes para a inscrición no censo de embarcacións autorizadas para realizar as actividades da pesca marítima profesional na Reserva Mariña de Interese Pesqueiro Os Miñarzos.

O prazo para poder presentar as solicitudes será dun mes, a contar dende o día seguinte ao da publicación desta Resolución no DOG. Así mesmo, as solicitudes formalizaranse no modelo que se publica como Anexo I da Orde do 27 de novembro de 2007 polo que se regula o uso e xestión da Reserva Mariña de Lira (DOG nº. 236, do 7 de decembro, con corrección de erros DOG nº 243, do 18 de decembro).

A entrega da documentación poderá realizarse no rexistro da Consellería de Pesca e Asuntos Marítimos ou en calquera dos lugares previstos no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo, adxuntando unha copia do DNI da persoa que a asine.

A Orde do 27 de novembro de 2007, pola que se regula o uso e xestión da Reserva Mariña de Interese Pesqueiro “Os Miñarzos” de Lira, publicada no Diario Oficial de Galicia o pasado mes de decembro, é a que recolle e establece as cuestións relativas á elaboración e revisión do censo de embarcacións autorizadas para a pesca marítima profesional na área protexida da reserva mariña; as actividades permitidas dentro da mesma, así como o seguimento científico e de divulgación que se levará a cabo, entre outras.

A publicación desta Orde deu continuidade ao proceso de creación da Reserva Mariña de Lira, que se iniciou coa publicación no DOG, o pasado mes maio, do Decreto 87/2007, polo que se crea esta área protexida, aprobado polo Goberno galego, e a posterior constitución do Órgano de Xestión, Seguimento e Control da Reserva.

Nova xuntanza do Órgano de Xestión

O director xeral de Recursos Mariños, Antonio García Elorriaga, xunto con técnicos das consellerías de Pesca e Medio Ambiente, e representantes das confrarías de pescadores de Lira, Fisterra, Corcubión, e da Federación Galega de Confrarías, participaron na tarde de onte en San Caetano nunha nova xuntanza do Órgano de Xestión, Seguimento e Control da Reserva Mariña de Interese Pesqueiro “Os Miñarzos” de Lira.

Entre os contidos da orde do día da xuntanza estiveron, ademais da aprobación da acta anterior, a posibilidade de que na Reserva Mariña se poida acometer un Plan de Repoboación Específico con soltas de rodaballo e linguado, e a solicitude da Confraría de Pescadores de Lira para establecer un período de prohibición da extracción da centola na Reserva.

Na reunión do Órgano de Xestión, Seguimento e Control da Reserva Mariña de Interese Pesqueiro “Os Miñarzos” que tivo lugar onte propúxose a posibilidade de que, coa colaboración da piscifactoría ubicada en Lira, se poida levar a cabo un Plan de Repoboación Específico para a área protexida, coa solta de alevíns de rodaballo e linguado. Sobre esta cuestión os membros do Órgano acordaron estudar esta posibilidade e a Consellería de Pesca comprometeuse a realizar un estudo biolóxico exhaustivo sobre a idoneidade destas actuacións en augas da Reserva.

No marco do Plan de Repoboación de Especies Mariñas no Litoral Galego, que impulsa a Consellería de Pesca, xa se teñen desenvolvido soltas de exemplares xuvenís de lumbrigante na zona da área protexida de Lira.

Con respecto á segunda das temáticas, no transcurso da xuntanza abordáronse cuestións relacionadas coa adopción de medidas de xestión específicas para certas especies de relevante interese comercial dentro da Reserva Mariña. É o caso da centola, para a que se ratificaron as medidas especiais propostas xa en anteriores xuntanzas, como elevar a talla mínima de 12 a 15 centímetros e establecer o tope máximo de captura en 30 quilos de centola por tripulante e día, xa aprobadas na anterior reunión do Órgano. Ademais, propúxose que se prohiba a extracción deste recurso dende o día 12 de xaneiro, ás 00.00 horas, e ata o día 17 de febreiro, ás 00.00 horas, por mor da importante baixada dos prezos deste crustáceo no mercado . Estas novas medidas foron aceptadas por todos os membros do Órgano de Xestión, Seguimento e Control presentes na reunión de onte.

Xa o pasado 29 de novembro se decretara a prohibición de extraer a centola  a partires do día 1 de decembro e ata o día 17 do mesmo mes, a partires desta última data comezaron a traballar coas medidas específicas establecidas para a xestión deste crustáceo en augas da Reserva Mariña. Dende ese último día estivo permitida a extracción de centola, pero agora, por acordo do Órgano de Xestión, decretarase un novo peche.

O Órgano de Xestión acordou tamén, na reunión de onte, iniciar o proceso de cartografiado da Reserva Mariña co obxecto de comunicar os límites da mesma ao Instituto Hidrográfico de La Marina (Ministerio de Defensa) para que as represente nas Cartas Náuticas de acordo coas normas internacionais de seguridade na navegación.

A Reserva Mariña formará parte da Rede Iberoamericana de áreas protexidas

Na última reunión que tivo lugar o pasado mes de novembro, en concreto o día 26, os integrantes do Órgano de Xestión, Seguimento e Control da Reserva Mariña de Interese Pesqueiro, “Os Miñarzos” aprobaron a proposta da Consellería de Pesca de iniciar os trámites para incluír á esta área protexida galega na Rede Iberoamericana de Reservas Mariñas.

Coa integración nesta Rede a Reserva Mariña de Lira poderá cooperar conxuntamente no desenvolvemento e fortalecemento dos espazos mariños protexidos no marco dun crecemento pesqueiro sustentable das poboacións locais. Ademais, a súa inclusión neste organismo servirá para intercambiar permanentemente información sobre os espazos protexidos co fin de mellorar a súa xestión; desenvolver proxectos comúns que promovan os vínculos entre as zonas que forman parte da rede; transferir a experiencia e coñecemento adquiridos en xestión, divulgación   e ensino, así como mellorar na formación e no seguimento destes espazos mariños.

O desenvolvemento e mantemento da Rede Iberoamericana de Reservas Mariñas depende da Secretaría General de Pesca Marítima do Ministerio de Agricultura, Pesca e Alimentación (MAPA) e a parte adicada á coordinación forma parte das tarefas do Instituto Español de Oceanografía. Na actualidade está integrada por 40 espazos mariños protexidos distribuídos entre Costa Rica, Ecuador, México, Panamá, Perú, Venezuela e España.