Da aba ó zuncho, dúas mil verbas de construción naval
REPORTAXE DE MONTSE MAYORAL
O Colexio Oficial de Enxeñeiros Navais e Oceánicos vén de editar, co apoio da Consellería de Presidencia, o primeiro “Dicionario Galego de Construción Naval”. Do volume só saíron uns 200 exemplares que non se distribuiron comercialmente, pero os interesados en consultalo poden facelo na rede.
Aaba é a beira ou marxe dun río ou do mar e o zuncho, unha abrazadeira de ferro ou calquera material resistente que serve para cinxir ou fortalecer determinada cousa, como poden ser as pas dos remos. Entre estas dúas verbas hai máis de dúas mil pertencentes ó eido da construción naval, que están por primeira vez recollidas nun dicionario.
A iniciativa foi do Colexio Oficial de Enxeñeiros Navais e Oceánicos, entidade que contou coa colaboración de filólogos e xornalistas para facer esta primeira escolma de vocablos. Faltan moitos máis, de aí que a entidade teña aberta en internet unha ventá para todos aqueles profesionais do sector que queiran facer aportacións. En www.dicionarionavalgalego.ingenierosnavales.com pode descargarse o dicionario, consultar en liña calquera voz e facer as aportacións oportunas.
O traballo resposta ás peculiaridades do sector. Así, cada voz conta coa súa definición e sinónimos en galego, xunto coa súa tradución ó español, ó portugués e ó inglés. Cómpre lembrar que Galicia capitaliza o 50% da actividade do naval de España, nos dous polos fundamentais de Ferrol e Vigo, e que as relacións cos mercados estranxeiros é fundamental, como proban, por exemplo, os buques que están a construir os estaleiros da ría para Noruega e Australia.
O novo dicionario tivo en Ferrol moitos colaboradores e axuda técnica. A empresa 3.14 Financial Contents encargouse da consultoría e tecnoloxía asociada ó proxecto e o seu director, Manuel Míguez, estivo co decano do COIN, Guillermo Gefaell, na recente presentación do volume que se celebrou no Museo do Mar de Vigo.
