Santiago de Compostela, 29 de setembro de 2008.- Comunidades de pescadores artesanais de Galicia e Sudamérica debaten dende hoxe en Vigo a problemática do sector e o seu papel na preservación do medio mariño, no marco do Seminario da Rede de Comunidades Pesqueiras para o Desenvolvemento Sostible (Recopades). Esta actividade está organizada polo Centro Tecnolóxico do Mar – Fundación Cetmar e conta co apoio da Consellería de Pesca e da Fundación Lonxanet.
O acto de apertura do seminario tivo lugar esta mañá e estivo presidido pola directora da Fundación Biodiversidad, dependente do Ministerio de Medio Ambiente y Medio Rural y Marino, Ana Leiva. Tamén participaron na inauguración o director do Cetmar, Alberto González-Garcés, o director da Fundación Loxanet, Antonio García Allut, e o director xeral de Recursos Mariños, Antonio García Elorriaga.
Durante a súa intervención ante os representantes das oito comunidades de pescadores artesanais que asisten ao Seminario Recopades procedentes de Arxentina, Brasil, Chile, Uruguai e Galicia, a directora da Fundación Biodiversidad destacou o interese desa entidade polo desenvolvemento sostible do mar e o papel do sector pesqueiro como “gran aliado” de cara á conservación do medio mariño. Asegurou tamén que “a necesidade de avanzar no coñecemento, conservación e uso sostible dos recursos mariños é acuciante” e resaltou a importancia de que administracións e sociedade civil aúnen esforzos en proxectos conxuntos que persigan eses obxectivos. Leiva, que detacou o labor “relevante” do Centro Tecnolóxico do Mar no “fomento da I+D+I no sector pesqueiro galego, español, europeo e mundial”, incidiu no papel dos pescadores artesanais como “gardiáns do mar”.
Pola súa banda, o director do Cetmar, Alberto González-Garcés, foi o encargado de dar a benvida aos integrantes de Recopades, unha rede que definiu como “unha ferramenta útil para un bo desenvolvemento e xestión dos ecosistemas mariños e dos seus recursos”, e o fixo acompañado por Antonio García Allut, director da Fundación Lonxanet, que lidera este proxecto. García Allut vinculou tamén o futuro dos recursos pesqueiros á permanencia e existencia dos pescadores artesanais e falou de Recopades como unha rede “única a nivel global que constitúe un mosaico de solucións a problemas” exportables a outras comunidades pesqueiras.
Reservas mariñas
Ademais da presentación das comunidades Recopades, labor que correspondeu ao coordinador da rede en Latinoamérica, Cadudzzi Salas, nesta primeira xornada do seminario participaron como relatores o coordinador de estudos e proxectos da Fundación Biodiversidad, Ignacio Torres, e o director xeral de Recursos Mariños, Antonio García Elorriaga. O representante da Consellería de Pesca falou aos presentes das reservas mariñas, dos mecanismos existentes para a súa creación, dos seus obxectivos e dos seus resultados sobre o sector pesqueiro e a pesca artesanal, sobre o medio e sobre a sociedade.
García Elorriaga incidiu no interese da Consellería de Pesca e Asuntos Marítimos na creación dunha destas áreas en cada unha das rías galegas, unha medida que, resaltou, precisa do “consenso e implicación” do sector pesqueiro. De feito, sinalou que “non haberá reservas mariñas que non sexan solicitadas polo sector” do que, dixo, “debe involucrarse tanto na creación como na xestión e control” desas zonas de protección.
Na súa exposición, o director xeral falou da única reserva mariña que existe actualmente en Galicia, a de “Os Miñarzos” en Lira (no concello coruñés de Carnota), así como dos dous proxectos xa “avanzados” para a posta en marcha das áreas de Cedeira e Celeiro e dos primeiros pasos que se están dando para crear outras dúas en Camelle e Aguiño. ”Cando todas estas reservas estean funcionando ampliaremos a rede”, adiantou.
Precisamente, dentro do programa do Seminario Recopades, que finalizará o venres na sede do Centro Tecnolóxico do Mar, están previstas visitas á Reserva Mariña de Lira e a Cedeira, entre outras actividades.
