O obxectivo deste encontro foi tratar diversos asuntos de interese para o sector pesqueiro galego como a nova Lei de Pesca e os decretos que a desenvolverán, a constitución dos Grupos de Acción Costeira e a situación da frota do cerco, entre outros.

No que respecta á Lei de Pesca, a Conselleira informoulles do estado actual da súa tramitación, destacando que a súa aprobación definitiva se espera para o primeiro semestre de 2008. Neste senso, comunicoulles que as distintas direccións xerais que compoñen o seu departamento están a traballar nos diferentes decretos que desenvolverán a nova norma para proceder ao proceso de consultas entre os axentes que representan ao sector.

Outro dos temas tratados foi a posta en marcha dos Grupos de Acción Costeira en Galicia para dar cumprimento ao Eixo prioritario número 4 que establece o Fondo Europeo da Pesca e no que a participación do sector é moi importante. Deste xeito, a Conselleira informoulles que en vindeiras datas a Fundación Cetmar organizará unhas xornadas con ampla difusión para que o conxunto do sector pesqueiro galego teña toda a información necesaria ao respecto: dende como se constitúen estes grupos, ata o traballo que levarán a cabo.

Ao mesmo tempo, e dado que esta mesma mañá se procedeu á aprobación por parte do Consello da Xunta da intervención da Confraría de Pescadores de Ferrol, da cal xa se lle informara ao presidente da Federación Galega, a Conselleira de Pesca explicoulles de xeito pormenorizado o alcance desta medida tomada polo seu departamento. Todos os presentes amosaron o seu apoio á decisión adoptada hoxe polo Goberno galego.

Á xuntanza presidida por Carmen Gallego asistiron o presidente da Federación Galega de Confrarías de Pescadores de Galicia, Evaristo Lareo » ; o presidente da Federación provincial de A Coruña e tamén responsable da Federación Nacional, Genaro Amigo; o titular da Federación provincial de Pontevedra, Manuel Pazos, e a representante da Federación provincial de Lugo, Faustina Solloso.