Santiago de Compostela, 31 de xullo de 2008.- O Consello da Xunta deu hoxe o seu visto e prace á modificación do Decreto polo que se crea a Reserva Mariña de Interese Pesqueiro “Os Miñarzos” en Lira – Carnota, impulsada pola Consellería de Pesca e Asuntos Marítimos e pola Confraría de Pescadores de Lira. O obxecto do presente decreto é levar a cabo certas modificacións derivadas da posta en funcionamento da reserva e das propostas realizadas dende o seu Órgano de Xestión, Seguimento e Control. Entre as novidades que se incorporan no novo decreto están a dotación dun Plan de Xestión Integral como instrumento de planificación áxil e flexible, así como a corrección da delimitación do ámbito da reserva debido a pequenos desaxustes nalgúns puntos xeográficos.
A posta en funcionamento da reserva a través do Decreto 87/2007, do 12 de abril, a pesares do curto período de tempo transcorrido, evidenciou unha boa acollida no conxunto da sociedade galega e, máis particularmente, na comunidade pesqueira do ámbito de influencia da zona protexida. A resposta positiva por parte do sector, xunto á implicación e compromiso dos propios profesionais do mar, sentou as bases para un axeitado funcionamento da reserva e supón á vez un estímulo para a introdución de melloras necesarias que permitan adecuar a xestión dos recursos pesqueiros e marisqueiros aos principios inspiradores da súa creación.
Deste xeito, entre as modificacións máis destacadas que se levarán a cabo con este novo decreto está a dotación do Plan de Xestión Integral que permitirá adoptar, baixo criterios de sustentabilidade, as medidas específicas para cada unhas das pesqueiras, ao tempo que se incrementará o grao de participación dos pescadores no desenvolvemento e aplicación deste instrumento. Así, para que os profesionais do mar participen máis activamente no deseño do Plan, ampliarase o carácter do censo no que deben estar inscritos todos os profesionais que realicen actividades na Reserva Mariña de Lira, xa que se inclúen nel os mariscadores a pé e aquelas embarcacións dedicadas á captura de ourizo, navalla/longueirón, algas e poliquetos, que desenvolven a súa actividade no marco dos plans de explotación. Con esta incorporación, todos os colectivos que faenan habitualmente no ámbito da reserva adquiren o mesmo grao de responsabilidade no cumprimento das medidas acordadas no Plan de Xestión Integral.
En relación a isto, o novo decreto incorpora o artigo 6 bis, denominado réxime de xestión da reserva, no que se establecen as cuestións que o Plan de Xestión Integral deberá desenvolver e as súas características. Entre elas destacan que a proposta do Plan deberá ser elaborada polas entidades asociativas que representen aos pescadores e mariscadores e que poderá ter unha vixencia plurianual. Así mesmo, este documento poderá recoller as medidas ou normas, distintas ás establecidas nas disposicións regulamentarias, co obxectivo de acadar unha explotación racional, responsable e sustentable dos recursos pesqueiros e marisqueiros da área mariña protexida.
Este Plan deberá estar aprobado nun prazo de seis meses, contado dende a entrada en vigor deste novo decreto. Mentres non sexa ratificado, seguirán en vigor as normas de xestión que están aprobadas e en vixencia.
Ademais desta novidade, e dado que se teñen detectado pequenos desaxustes nalgúns puntos xeográficos do ámbito da reserva, como consecuencia das propias condicións xeográficas da zona, corrixiranse as coordenadas xunto coas referencias toponímicas. De todos os xeitos, é de destacar que ningún dos cambios que se realizan a nivel global do ámbito da área protexida son de carácter trascendente.
Neste sentido, co novo decreto aprobado hoxe polo Goberno galego, a área protexida divídese igualmente nunha reserva xeral e en dúas zonas de reserva integral, diferenciando agora entre zona sur e zona norte. No caso da área de interese pesqueiro, mantéñense as actividades que o decreto vixente establecía como permitidas e incorpóranse a posibilidade de recollida de mexilla, que unicamente se realizará mediante acordo entre as confrarías de pescadores do ámbito da reserva e os concesionarios de bateas ou liñas de cultivo; así como a pesca marítima de recreo en superficie. En canto ás dúas áreas de reserva integral, mantéñense as mesmas restricións que ata o de agora.
Creación da Reserva Mariña de Lira
O Consello da Xunta de Galicia aprobou o pasado 12 de abril de 2007 o Decreto polo que se crea a Reserva Mariña de Interese Pesqueiro “Os Miñarzos” de Lira co obxecto de delimitar xeograficamente esta área protexida, así como o establecemento dos límites de uso e prohibicións de pesca na reserva e a configuración dun sistema de xestión e participación do sector pesqueiro nel.
Coa creación desta reserva mariña, a primeira deste tipo que se pon en marcha en Galicia, buscouse protexer e favorecer a rexeneración dos recursos pesqueiros, impulsar a pesca e o desenvolvemento sostible, conservar a flora e a fauna do medio mariño e a súa diversidade, fomentar a sensibilización ambiental sobre o mar, divulgar os valores pesqueiros e ambientais da costa galega e favorecer os estudos científicos sobre as medidas de protección dos recursos e xestión das pesqueiras. Ademais, a creación desta área protexida busca aportar novas oportunidades socio económicas no campo do turismo e do lecer que favorezan a diversificación das actividades da comunidade pesqueira e a posta en valor dos pescadores e da cultura mariñeira.
Esta iniciativa segue pois a liña dos obxectivos definidos polo Fondo Europeo da Pesca, tanto no que se refire a fomentar a protección do medio ambiente e dos recursos naturais, como a promover o desenvolvemento sostible e a mellora da calidade de vida nas zonas nas que se exercen actividades vencelladas á pesca .
