Mañá, como cada oito de xuño, celébrase en todo o planeta o Día Mundial dos Océanos para conmemorar a entrada en vigor, en 1994, da Convención das Nacións Unidas a prol do Dereito do Mar. Con esta conmemoración preténdense promover actividades entre toda a poboación mundial que favorezan a necesaria concienciación sobre a protección da chamada “pel azul” da Terra.
A importancia dos océanos reside en que conteñen as nove décimas partes dos recursos da auga do mundo e máis do 97 por cento de todos os seres vivos. Ademais, son os principais protagonistas da formación do clima e supoñen dada a súa amplitude o máis importante alicerce da vida no noso planeta.
Por isto, no día de mañá e por sempre, todos debemos tomar conciencia e evitar en todo o posible os impactos sobre este medio natural. Debe ser unha obriga para todos protexer os mares, as súas especies e as súas beiras de accións pouco respectuosas co medio e tamén coa paisaxe, sobre todo para que as xeracións futuras saiban agradecérnolo e tamén para acadar que o medio mariño continúe sendo xeneroso co ser humano.
Neste sentido, a Consellería de Pesca e Asuntos Marítimos traballa no desenvolvemento d un amplo abano de accións e medidas para a protección dos mares e das nosas costas, así como das especies recu rso explotadas no noso litoral. Así, entre algunhas delas, podemos destacar a creación da Reserva Mariña de Interese Pesqueiro “Os Miñarzos” de Lira (Carnota – A Coruña), posta en marcha en abril de 2007, que representa o exemplo máis claro dunha política dirixida á protección do medio mariño e das súas especies. Trátase da primeira área protexida posta en marcha na nosa Comunidade Autónoma á que se poderán unir outras en breve.
Coa creación da Reserva Mariña de Lira, o Goberno galego persegue protexer e favorecer a rexeneración dos recursos pesqueiros, impulsar a pesca e o desenvolvemento sostible, conservar a flora e a fauna do medio mariño e a súa diversidade, fomentar a sensibilización ambiental sobre o mar, divulgar os valores pesqueiros e ambientais da costa galega e favorecer os estudos científicos sobre as medidas de protección dos recursos e xestión das pesqueirías. Ao mesmo tempo, o desenvolvemento deste espazo de especial protección aportará novas oportunidades socioeconómicas no campo do turismo e do lecer que favorecerán a diversificación das actividades da comunidade pesqueira e a posta en valor dos pescadores e da cultura mariñeira.
Ademais, hai que destacar o Plan de R epoboación de E specie s Mariñas no Litoral Galego que leva a cabo a Consellería de Pesca co fin de recuperar a importancia dos stocks daqueles recursos de baixa reprodución e crecemento lento , como o rodaballo ou o lumbrigante. No marco desta iniciativa, e no entorno da Reserva Mariña de Lira, liberáronse xa un total de 7.600 exemplares de lumbrigante.
Polo tanto, dende a Xunta de Galicia consideramos que é necesario afondar na idea de que a protección dos océanos non é nin pode ser allea a ningunha administración, institu ción pública e privada. Do mesmo xeito, non pode pasar inadvertida aos particulares que teñan relación co medio , aínda que esta sexa mínima .
O labor dos océanos e os seus beneficios
Os océanos non só impresionan pola súa ocasional grandeza paisaxística en días de tormenta, senón tamén pola abraiante proporción que cobren do noso planeta, os dous tercios da superficie da Terra, mentres que a humanidade se concentra no tercio restante. Os océanos producen alimentos proteínicos, aproveitados polos pescadores dende a costa ou ría máis inmediata ata os mares máis afastados. Serven tamén de vía de comunicación e transporte e, neste senso, a primeira travesía do noso Océano inmediato supuxo para a humanidade unhas consecuencias históricas, que fixeron cambiar de xeito radical o mundo tal e como se coñecía a finais do século XV.
Hai outras funcións menos perceptibles pero fundamentais que cumpren os océanos, é a súa participación na fotosíntese do fitoplancto e do fitobentos da costa, fixando cantidades inxentes de CO 2. Na reacción química da fotosíntese a outra consecuencia deste proceso virtuoso, fonte de vida, é a produción de osíxeno (O 2), que purifica a atmosfera.
Ademais deste, outros beneficios fundamentais que se obteñen dos océanos son os seus efectos de moderador do clima, ben como efecto indirecto das grandes masas de auga ou como reflexo da existencia de correntes cálidas como a do Golfo, que baña as costas europeas, moderando a súa temperatura, en contraste có que sucede nas mesmas latitudes atlánticas da América do Norte.
En definitiva, o mar e os océanos forman parte fundamental da vida do ser humano. O medio mariño apórtanos, entre outras cousas, alimentos, vías de comunicación, paisaxe, así como espazos de lecer. Neste sentido, e non podía ser doutra forma, a función do home é coidalo e protexelo.
